مفتی صاحب اللہ نے آپ کو مسجد کے منبر پر بٹھا دیا ہے اور سوشل میڈیا پر بہت لوگ سنتے ہیں چند امور آپ سنجیدگی سے غور کرلیں۔

یہ عورت شادی شدہ تھی جس نے بھاگ کر دوسرے شوہر سے شادی کرلی اگر اس کو اپنا شوہر پسند نہیں تھا اور خلع لیتی اور شوہر خلع نہیں دیتا اور پھر یہ ریاست پاکستان کی عدالت سے خلع لیتی تو آپ نے فتوی دیا ہے کہ عدالتی خلع پر نکاح نہیں زنا کی مرتکب ہورہی ہے اور اس عورت کے بھائی باپ اور عزیز واقارب سوچتے کے زنا کی مرتکب ہورہی ہے اور اس کے پیدا ہونے والے بچے بھی اولاد الزنا ہیں تو ان بچوں کا مستقبل کیا ہوتا؟ ایک طرف سابقہ شوہر اور اس کے خاندان والے دوسری طرف عورت کے خاندان والے اور تیسری طرف ان کے رشتہ دار اور چوتھی طرف علاقہ کے عام لوگوں میں اس کا کیا تاثر پھیلتا؟ اور نتیجہ کیا نکلتا؟ لوگ سمجھتے کہ ہمارا عدالتی نظام خرابیوں کی جڑ ہے اور پاکستان میں افغانستان طرز کی اسلامی امارت کیلئے جہاد کرنا شروع کرتے آپ فتوی دیتے کہ یہاں بھلے ہمارا ریاستی نظام ناجائز اولاد پیدا کرنے کا سپورٹر ہے مگر جہاد جائز نہیں ہے تو کون آپ کا فتوی مانے؟ جب رسول اللہ صلی اللہ علیہ وسلم پر وحی نازل ہورہی تھی تو انصار کے سردار حضرت سعد بن عبادہ رضی اللہ عنہ نے کہا کہ میں قرآن پاک کے لعان کے حکم کو نہیں مانتا اگر بیوی کو رنگے ہاتھ پکڑلیا تو لعان کے بجائے دونوں کو قتل کردوں گا اور بخاری شریف کی اس حدیث کی تشریح میں علماء نے سعد بن عبادہ کی غیرت کو سراہا ہے۔

جب صحابی نے رسول اللہ صلی اللہ علیہ وسلم کی موجودگی میں غیرت کے مسئلے پر الله کے حکم کو نہیں مانا تھا اور انصار نے کہا تھا کہ یارسول اللہ یہ بہت غیرت والا ہے اس سے درگزر کیجئے اس نے جب شادی کی ہے تو کنواری سے کی ہے اور جس کو طلاق دی ہے تو کسی دوسرے سے نکاح نہیں کرنے دی ہے تو کیا السابقون الاولون من المہاجرین و الانصار سے 15 صدی ہجری کے بلوچ پشتون اور دوسرے قبائل زیادہ بڑے مسلمان ہیں؟ ماحول سے نکلنے کیلئے رسول اللہ صلی اللہ علیہ وسلم کی صحبت سے بڑا وسیلہ نہیں ہوسکتا تھا جب رسول اللہ صلی اللہ علیہ وسلم نے فرمایا کہ اسلام اجنبیت کی حالت میں شروع ہوا تھا اور عنقریب یہ پھر اجنبی بن جائے گا پس خوش خبری ہے اجنبیوں کے لئے تو اس ماحول سے بھی واقف تھے کہ صحابہ کرام رضی اللہ عنہم میں اشراف کا درجہ رکھنے والے لعان کے حکم پر عمل نہیں کریں گے تو اسلام اجنبی بن جائے گا اور پھر آنے والے وقت میں حلالہ کی لعنت بھی بطور عذاب زندہ ہوجائے گی چنانچہ بہت قریب کے دور میں مولوی پیدا ہوگئے اور حکمران اشرافیہ طلاق دے دیتے تھے تو اس کیلئے حیلہ نکالتے کہ رجوع ہوسکتا ہے اور بے بس لوگوں کی بیگمات چودھ دیتے تھے اور اس کی وجہ سے اسلام بھی اجنبیت کا شکار ہوگیا عوام کی سمجھ سے بالاتر ہوا اور پھر خواص کے بغل سے بھی نکل کر ثریا پر پہنچ گیا اور نبی صلی اللہ علیہ وسلم نے خوشخبری دی کہ اجنبی اس کو واپس لائیں گے۔

اب اگر بلوچ قبائل اس کیس کو افغانستان میں طالبان کے پاس لے جاتے اور اس عورت اور مرد دونوں کو پتھروں سے سنگسار کردیا جاتا تو اس کا کیا نتیجہ نکلتا؟ جو معاملہ ہماری سوشل میڈیا کی زینت بنا ہوا ہے پھر وہ بین الاقوامی میڈیا کی زینت بن جاتا اور اس قتل کے مقابلے میں سنگساری کے معاملات عوام اور صحافیوں کے ہاں کیا ہوتے؟ جب نہ ہمارے پاکستان کی عدالتی نظام کو قابل ستائش قرار دیا جائے اور نہ افغانستان کی امارت اسلامی کے نظام کو تو پھر معاملہ جہاں ہے وہاں چھوڑ دیا جائے؟ اس کی بھی وضاحت ہونی چاہیے بلوچستان کے جرگہ نظام پر میں لعنت بھیجتا ہوں جہاں غریب کو صفائی کیلئے آگ پر چلایا جاتا ہے اور وہاں بھی مذہب سے دلیل پکڑی جاتی کہ حضرت ابراہیم علیہ السلام بے گناہ تھے تو آگ نے نہیں جلایا۔