اختلاف کو تحمل سے سننے اور جھگڑا نہ کرنے کے مشن کو گلی گلی ، محلے محلے ، شہر شہر ، گاؤں گاؤں ملک کے کونے کونے تک پہنچانا چاہیے

ڈاکٹر طاہر القادری ، عمران خان اور مصطفی کمال کا رویہ ایک جیسا ہے ، پی ایس پی کے رہنما اچھے مشن کو ہدف بنا کر مثلث تشکیل دیں

ڈاکٹر فاروق ستار کی تعلیم و تربیت اپنے والدین اور اساتذہ کے ذریعے سے اچھے ماحول میں ہوئی ہے جبکہ مصطفی …. اشرف میمن

ڈاکٹر فاروق ستار نیک والدین اور اچھے اساتذہ کی نگرانی میں تعلیم و تربیت کے مراحل طے کرکے ڈاکٹر بنے۔ الطاف حسین کا انکے کردار ، تعلیم ، ذہنیت ، بچپن ، لڑکپن ، جوانی اورزندگی کے مختلف مراحل پر کوئی اثر نہ تھا مگر اسکے برعکس مصطفی کمال کی گروتھ دیگر ماحول میں ہوئی۔ آج سمندر کے راستے کسی بھی فوجی یا عام آدمی کو انیس قائم خانی اور ڈاکٹر فاروق ستار میں سے کسی ایک کے انتخاب کا اختیار دیا جائے تو وہ ڈاکٹر فاروق ستار کیساتھ جانا پسند کریگا یا انیس قائم خانی کیساتھ؟۔ شاہ زیب خانزادہ کے ذمہ یہ سوال لگایا جائے۔ جناب مصطفی کمال ہی بتائے کہ اگر وہ روتے روتے بدحال ہوجائے اور قسمیں کھا کھا کر یقین دلائے کہ انیس قائم خانی ڈاکٹر فاروق ستار کے مقابلے میں بڑا معصوم ہے تو کیا کوئی اسکی بات پر یقین کرنے کیلئے تیار ہوگا؟۔ مصطفی کمال کی رگ و ریشے میں جو تعلیم و تربیت رچ بس گئی ہے ، اپنی ذات کو اسکے حصار سے نکالنا کوئی آسان کام نہیں ہے۔
اگر متحدہ قومی موومنٹ کو چندسالوں سے خصوصی طور پر نشانہ بنا کر ایک عرصہ سے رہنماؤں اور کارکنوں کا تزکیہ ہورہا ہے تو یہ کہا جاسکتا ہے کہ کراچی والوں کی قسمت جاگ گئی ہے لیکن دوسری طرف اگر انہی لوگوں کو پھر سے فری ہینڈ دیکر کراچی والوں پر مسلط کیا گیا تو اللہ تعالیٰ بھی ایجنسیوں کو معاف نہیں کریگا۔ پہلے پیپلز پارٹی کے مقابلے میں سندھی قوم پرست ، مہاجر لسانی فسادات اور فرقہ واریت کو ہوا دی گئی ، پھر طالبانائزیشن کے ذریعے جی ایچ کیو سے لیکر ملک کے کونے کونے تک عوام اور اداروں کی ہتک کی گئی۔ اب جنرل راحیل شریف نے جہاں پختونخواہ ، بلوچستان اور کراچی میں ایک خوشگوار تبدیلی کا آغاز کیا ہے وہاں دوبارہ دوسرے قسم کے مسائل کھڑے نہ ہوں اور لگتا یہ ہے کہ سید مصطفی کمال نے تبلیغی جماعت میں وقت لگایا ہے ، اچھی بات ہے اگر مذہبی جماعتوں میں کوئی بھی پسند نہ ہو تو متحدہ قومی موومنٹ کے مقابلے میں نئی سیاسی صف بندی کے بجائے محفل مشاعرہ کا اہتمام کریں۔ اس سے قوم کی اچھی اصلاح ہوسکتی ہے، وہ نہ دوہرایا جائے جس کا سبق سیکھا گیا ہے۔ لوگ سیاست سے تو تنگ آگئے ہیں اور ڈرامہ بازی سے بھی۔
مذہبی جماعتیں اپنے مخصوص ڈھانچے میں رہ کر اپنا تشخص قائم رکھتی ہیں لیکن عوام کے اندر آکر اخلاقیات ، قرآن و سنت کی تعبیر و تشریح میں انفرادیت اور جائز ناجائز کے حوالے سے قابل قدر کردار ادا نہیں کرتی ہیں۔ پاک سر زمین پارٹی میں رضا ہارون سمیت بڑے عمدہ اور اچھے لوگ ہیں ، قیادت کیلئے جذباتی ہونے سے زیادہ سنجیدہ ہونا ضروری ہوتا ہے۔ شاہ زیب خانزادہ نے یہ سوال کیا کہ اگر پی ایس پی کے پاس بڑی تعداد میں عوام ہیں تو ضمنی الیکشن لڑ کر دیکھ لیں۔ اگر ضمنی الیکشن میں متحدہ کو بہت کم ووٹ پڑا ہے تو اس سے یہ ثابت نہیں ہوتا کہ لوگ اب بھی الطاف حسین کو ہی مانتے ہیں یا اس کا کوئی اور مطلب لیا جائے۔ جس کے جواب میں مصطفی کمال جھنجھلا گئے اور قدرے ناراضگی سے کہا کہ ’’آپ لکھ کر رکھ لو ، لوگوں نے ہمارے لئے اپنی انرجی 2018ء کے الیکشن کیلئے جمع کر رکھی ہے ، اس میں لوگ بڑی تعداد میں نکل کر ہمیں ووٹ دینگے‘‘۔
اگر مصطفی کمال یہ کہتے کہ’’ فی الحال عوام کنفیوز ہیں ، آنے والے الیکشن میں ہمارے ساتھ ہونگے ‘‘ تو بہتر ہوتا۔ خدا کا خوف رکھنے والے مسلمان یہ کیسے کہہ سکتے ہیں کہ جس طرح چوزہ انڈے سے اپنے مخصوص وقت میں نکلتا ہے ، اسی طرح سے لوگوں نے ہمارے لئے ووٹ کی قوت کو محفوظ کرکے رکھا ہوا ہے اور وقت پر انڈہ ٹوٹے گا۔ مرکز میں ڈاکٹر طاہر القادری اور عمران خان کا رویہ اور کراچی میں سید مصطفی کمال کا رویہ ایک ہی جیسا لگتا ہے ، انکو مثلث بنا کر ایک ہی پارٹی بنانا چاہیے۔ اگر ایک اچھا نظریہ لیکر پاک سر زمین پارٹی کی قیادت تحریک انصاف اور عوامی تحریک کا رُخ کرلیں تو یقین سے کہا جاسکتا ہے کہ پاکستان کی سطح پر عوام کو سیدھے راستے پر لگانے میں کامیابی ملے گی۔ فرقے ، جماعتیں ، تنظیمیں ، پارٹیاں اور ان کے مختلف خول مسائل کا حل نہیں بلکہ عوام کو ان سے نکالنا ہی مسائل کا حل ہے۔ اقتدار کی سیڑھی پر لگنے کیلئے بڑے پاپڑ بیلنے پڑتے ہیں اورآداب غلامی ، آداب مصلحت ، آداب منافقت ، آداب ۔۔۔نہ۔۔۔جانے کیاکیا کرنا پڑتاہے۔
آدھی عمر الطاف حسین کے فلسفے کو سمجھانے ، دفاع کرنے اور عام کرنے میں گزار دی اور باقی اس کی مخالفت میں گزرے تو زیادہ سے زیادہ حساب برابر ہوجائیگا۔ قرآن کی چند آیات جو طلاق سے متعلق ہیں اور سورہ نساء میں خواتین کے حقوق کے حوالے سے ہیں اگر ان کا صرف ترجمہ دیکھ کر مضامین کو سمجھ لیا جائے اور اس کو مشن بنایا جائے تو میاں بیوی ، بچے ، رشتہ داروں کی سطح سے لیکر عالمی سطح تک اس تحریک کو پذیرائی مل سکتی ہے۔ سید عتیق الرحمن گیلانی کی کتابیں ’’ابر رحمت‘‘ اور ’’تین طلاق کی درست تعبیر‘‘ دیکھ لی جائے اور علماء و مفتیان سے اس سلسلے میں ٹھیک گفتگو کی جائے تو اُمت مسلمہ بہت بڑے عذاب سے نجات پالے گی۔ جب خواتین کو بنیادی حقوق اللہ تعالیٰ نے دئیے ہوں اور علماء نے ان کو ان سے محروم کیا ہو تو ایسی ماؤں کی گود میں پلنے والے بچے بھی جس جبری خاندانی نظام کے تحت زندگی گزارینگے ، ان سے بھی آزاد نہیں غلام ذہنیت ہی متوقع ہوگی۔
ہم ایک دفعہ شروع میں ان حقائق کو بتانے کے حوالے سے حاضر بھی ہوئے تھے لیکن ہماری ملاقات نہ ہوسکی تھی۔ یہ بہت بڑی خدمت ہے کہ اگر خلوص نیت سے اس بات کی تشہیر کی جائے کہ مخالفین کی بات سنجیدگی سے سنو ، اختلاف کو باتوں کی حد تک رکھو ، لڑائی جھگڑے اور قتل و غارت کے ماحول سے کراچی اور پورے پاکستان کو نکالو۔ اس مشن میں ہم بھی پورا پورا تعاون کرینگے اور اس کو ملک کے طول و عرض میں گلی گلی ، محلے محلے ، شہر شہر ، گاؤں گاؤں اور سب جگہ پہنچانا چاہیے۔

متحدہ کا راج تھا، عوام کے سر پر ہڑتال کی تلوار لٹکی رہتی تھی، الطاف حسین نے متحدہ کی لیڈر شپ کو بھی پٹوایاتو وکالت جاری رہی تھی

واقعی اپنی اصلاح کرنی ہے تو متحدہ کے رہنما ؤں کو چاہیے کہ اس معاشرے کے بالکل شریف ، ایمانداراور نئے چہرے لیکر آجائیں

جس طرح جنرل نیازی انڈیا کی قید میں رہ کر اپنی 95ہزار قیدی فوجیوں کیلئے قیادت کا کردار ادا کرتا تو کیافائدہ ہوتا؟ ارشاد نقوی

ڈاکٹر فاروق ستار ، خواجہ اظہار الحسن اور فیصل سبزواری پہلے مجرمانہ سرگرمیوں کے حوالہ سے اپنے قائد الطاف حسین اور کارکنوں کی وکالت کرتے تھے، توبہ کا دروازہ اللہ تعالیٰ بند نہیں کرتا لیکن اچھے وقتوں میں اچھے اقدام اچھے لگتے ہیں، عدالتی نظام اور سیکورٹی طریقہ کار بھی قابلِ رشک نہیں۔ جس کو مجرم بنادیا مگر وہ مجرم نہ ہو اور مجرم کو انجام تک پہنچانے کے بجائے باعزت بری کردیا تو کونسا نظام ہے؟ بدقسمتی سے ہمارے ہاں نظام بھی درست نہیں اور سیاسی جماعتیں بھی 420کے کردار والی ہوتی ہیں۔ کراچی جیسے شہر میں قتل وغارتگری کسی عوامی جماعت کیلئے بڑا مسئلہ نہیں ۔ پولیس اور فوجی اہلکاروں کو قتل کیا جائے تو گواہ بھی نہ ملے۔ کسی جائز کام سے تھانہ جانا ہو، گاڑی کاانشورنس ہواہو اور سامان چوری ہوجائے تو بھی بہت مشکل کا سامنا کرنا پڑتا ہے۔ پہلے لوگ حادثات میں ایک دوسرے کی مدد اسلئے نہیں کرسکتے تھے کہ پھر پولیس والوں سے جان نہیں چھوٹتی تھی۔اب عبدالستار ایدھی اور چھیپا وغیرہ نے یہ مشکل ہٹادی ہے لیکن باقی معاملات کو کون درست کرے گا؟۔
پہلے علاقہ کے ذمہ دار ، بڑے، محترم لوگ دیانت، سچ اور حقائق کی گارنٹی ہوا کرتے تھے، اب جو جتنا ڈھیٹ، نکما، بد دیانت، کمینگی میں گندھے ہوئے ضمیر کا مالک ہو۔وہی ذمہ دار، معتبر، محترم اور عزت مآب بنا پھرتا ہے۔ یہ صرف کراچی کی گلی کوچوں کی بات نہیں، مساجد، مدارس اور پاکستان کے کونے کونے میں پورے معاشرے کی یہی حالت ہے۔ ایسے میں کہیں سے تو انقلاب کا آغاز ہونا ہے۔ چپلقش بہت ہے، شیطان انسانوں کی خوشحالی پر خوش نہیں ہوتا ۔ ایسے دور میں جب ایم کیوایم کو بہت پریشانی تھی، نوشتۂ دیوار نے ان کو سہارا اور ڈھارس دیدی۔ راستہ صاف کیا اور بہت اچھے انداز میں دوسری سیاسی جماعتوں اور میڈیا کے حملوں سے نجات دلائی ، غلطیوں کی بھی اچھے انداز میں نشاندہی کردی۔ ہوا کا رخ بھی بدل گیا ہے لیکن ہماری دعوت یہ ہے کہ اب ایک دوسرا رخ اختیار کرکے اصلاح کی طرف درست آنے کی کوشش کی جائے۔
مہاجروں کو ابوالکلام آزادؒ کے اقوالِ زریں سے گمراہ نہ کیا جائے،ڈاکٹر عاصم حسین کی شاہ زیب خانزادہ نے رپورٹ پیش کردی کہ’’ دہشت گردوں کا علاج ایک ڈرامہ تھا‘‘۔پیپلزپارٹی سندھ اور وفاق کی جماعت ہے، الطاف حسین نے خود ساختہ جلاوطنی اختیار کی تھی، کارکن آنے سے روکتے تھے، حکومت نے نہیں روکا، ڈاکٹر عشرت العباد بھی مخصوص لوگوں کے نگاہوں میں بڑا قاتل، جرائم پیشہ اور سب کچھ تھا، الطاف حسین کا ہاتھ تھا تو گورنر بن گیا اور ہاتھ نہ رہا تو بھی طویل المدت گورنری کا ریکارڈ قائم کردیا۔ شیخ رشید کھل کر کہتا ہے کہ جنرل راحیل شریف زرداری کو ملک میں نہیں آنے دے رہا ۔ آئی ایس پی آر نے کبھی اسکی تردید نہ کی ، مہاجروں کو گلہ شکوہ نہیں مثبت انداز میں سوچنے اور انقلاب پر آمادہ کرنا ضروری ہے۔ تبلیغی جماعت اور دعوتِ اسلامی نے کتنے لوگوں کوکراچی میں اپنی طرف مائل کیا ہے؟۔ سیاست کا ڈھانچہ پہلے بھی کراچی اور حیدر آباد کے مہاجروں نے بدلا تھا اور اگر متحدہ کے رہنما سیاست کے معیار کو تبدیل کریں توبہت اچھا رہے گا۔
127کی صوبائی نشست متحدہ ہار ی، یہ پہلے بھی پیپلزپارٹی کی تھی، جن80 پولنگ اسٹیشن کے نتائج کو ڈاکٹر فاروق ستار نے تسلیم کیا ، ان میں 14،15ہزار ووٹ ملے تو یہ دیکھنا ہوگا کہ اس میں پہلے متحدہ کس مارجن سے جیتی تھی، اگر پہلے متحدہ کو 60، 70ہزار ووٹ ملتے تھے تویہ اعلان کرنا چاہیے تھا کہ اب 25ہزار ملتے اور ہم جیت بھی جاتے توبھی اپنی ہار تسلیم کرلیتے ہیں۔ پہلے اشفاق منگی کی مدد سے یہ جیت گئے اور اب یہ ہم ہارگئے ہیں تو کوئی مسئلہ نہیں ۔اس رویہ سے ان کی اخلاقی قدریں دوسروں کیلئے مثال بن جاتیں۔ ظفر ہلالی کا یہ کہنا کہ پہلے تم غلط کر رہے تھے، اب تمہارے ساتھ بھی ٹھیک ہورہا ہے مسئلہ کو مزید گھمبیر بنادیتا ہے۔ صحافت میں وکالت کرنا اچھی بات نہیں، گھوڑے گدھے کے سلوتری کو اتنا برا نہیں سمجھا جاتا جتنا ایک صحافی کے غلط رویہ پر اس کو بُرا سمجھا جاتا ہے۔معقول بات یہ ہے کہ جس تعداد میں متحدہ کے ووٹ کم ہوئے ہیں وہ قابلِ غور ہے۔ پیپلز پارٹی کے جتنے بڑھے ہیں، وہ کوئی انوکھی بات بھی نہیں ۔ اشفاق منگی والے مل گئے۔
یہ اچھی بات ہے کہ متحدہ قومی موومنٹ خود کو بدلنے کا عزم لئے ہوئے ہے لیکن مجبوری کے باعث بدلنے سے کوئی حقیقی تبدیلی نہیں آتی۔ ایک طرف بانی الطاف حسین اورلندن میں بیٹھے دیگر احباب کا دباؤ ہو ، دوسری طرف الطاف حسین سے محبت رکھنے والی عوام کا دباؤ ہو اور تیسری طرف ریاستی اداروں کا دباؤ ہو، چوتھی طرف دیگر سیاسی جماعتوں اور مصطفی کمال کا دباؤ ہو اور پانچویں طرف کارکنوں اور چھٹی طرف میڈیا کا دباؤ ہو تو مشکلات بڑھتی جائیں گی لیکن یہ الگ بات ہے کہ دباؤ ڈالنے والی قوتیں خود بھی بالکل ناکارہ پرزوں کی طرح ہیں۔
ایم کیوایم نے کھالیں جمع کرنے کا منع کیا ہے، کارکن عاجزی اور انکساری کیساتھ لوگوں سے کھالیں جمع کرکے غریب آبادیوں کے مکینوں تک صاف ستھرے طریقے سے پہنچادیتے تو بہت اچھا ہوتا۔ زکوٰۃ اور فطرہ غریبوں کا حق ہے مگر اس کیلئے بھی بڑے بڑے اداروں نے اپنے اپنے اکاؤنٹ کے ذریعے سے حقداروں کو ان کے حق سے محروم کردیا ہے۔ ایم کیو ایم کو پہلے سے چاہیے تھا کہ زور جبر نہیں خلوص سے عوام کی خدمت کرتے تو آج حالات بالکل مختلف ہوتے۔ اگر مساجد کی سطح پر بھی ممکن ہو تو پرہیزگار لوگوں کے ذریعے ایسی کمیٹیاں تشکیل دینا مناسب ہوگا جہاں قربانی کی کھالیں ، زکوٰۃ ، خیرات اور چندے غریبوں تک پہنچ جائیں۔فاروق ستار نے کہا کہ ان سے کھالیں چھین لی گئیں مگر زبردستی پر دل کے کرب کا احساس ہونا مکافات عمل کا نتیجہ لگتا ہے۔

مولانا فضل الرحمن اعلان کریں کہ مفتی محمودؒ نے زکوٰۃ کے مسئلہ پر غلط کیا تھا، سود کے مسئلہ پر بھی مفتی تقی عثمانی کا مؤقف درست ہے

سیاست میں مفاد، پیسہ اور اقتدار کی خاطر ضمیر کی قربانی مسئلہ اسلئے نہ رہا کہ اس حمام میں سب ننگے ہیں مگر دین کی حفاظت تو کریں

امام ابو حنیفہؒ ، امام مالکؒ اور امام شافعیؒ کے نزدیک متفقہ طور پر احادیث صحیحہ کیمطابق مزارعت جائز نہ تھی بعد میں…… فیروز چھیپا

مولانا فضل الرحمن نے اپنی زندگی کو اسلام کی خاطر سیاست کی نذر کردیا ، سیاست ایک عبادت ہے لیکن خیانت کی سیاست بڑی منافقت ہے ۔ مولانا فضل الرحمن مراقبہ کرکے یہ تجزیہ کریں کہ کیا کھویا کیا پایا؟۔ مفتی محمودؒ نے بھی سیاست کی اور اس سے پہلے مولانا آزاد ؒ ، شیخ الہندؒ ، مولانا حسین احمد مدنیؒ ، مولانا شبیر احمد عثمانیؒ وغیرہ نے بھی نظریاتی سیاست کی۔ بعض متحدہ ہندوستان کے حامی تھے اور بعض تقسیم ہند اور پاکستان کے حامی تھے۔ دونوں طبقے کانگریس اور مسلم لیگ کی طفیلی سیاست کررہے تھے۔ مولانا فضل الرحمن کی حیثیت بھی اپنے بڑوں سے بڑی نہیں ہوسکتی۔ ایک مرتبہ مفتی محمودؒ کو اپوزیشن کی قیادت مل گئی تھی مگر ذو الفقار علی بھٹو نے اسلام آباد میں پلاٹوں کا سلسلہ شروع کیا تو مفتی محمودؒ اور مولانا غلام غوث ہزارویؒ کے سوا ہر اپوزیشن رہنما نے پلاٹ کو قبول کرنے سے انکار کیا۔ مولانا فضل الرحمن جس ڈگر پر چل رہے ہیں اس میں بدعت ہے نہ جدت۔ بلوچستان میں اکثریت جمعیت علماء اسلام کے نمائندوں کی تھی جسکی وجہ سے بلوچستان کا وزیر اعلیٰ جمعیت علماء اسلام کا ہی بن سکتا تھا، مگر اس پر سودا بازی کی گئی اور صوبہ سرحد میں اقلیت والی جماعت کی بنیاد پر مفتی محمودؒ وزیر اعلیٰ بن گئے۔ الیکشن جیتنے کیلئے بھی دوسرے سیاسی امیدواروں کے ساتھ گٹھ جوڑ کرکے خود کو جتوانا اور اپنی جماعت کے افراد کو ہرانا بہت پرانا حربہ تھا۔
بنوں کی سیٹ پر جمعیت کا الیکشن لڑنے والے مولانا مطالبہ کرتے تھے کہ مولانا مفتی محمودؒ مرکز کے عہدیدار ہیں اسلئے میرے لئے بھی میرے حلقے میں آکر ووٹ مانگیں لیکن مفتی صاحب کا سیف اللہ برادران سے معاہدہ ہوتا تھا، ٹانک کی صوبائی نشست اور بنوں کی قومی نشست خفیہ طور پر دوسروں کو حوالے کردی جاتی تھی۔ مولانا فضل الرحمن کھل کر اس طرح کے معاملات کریں تو وہ صراط مستقیم پر گامزن ہیں البتہ مفتی محمودؒ نے ختم نبوت کا مسئلہ حل کرنے میں زبردست کردار ادا کیا ، زکوٰۃ کے مسئلے پر زندگی کی آخری گفتگو کی ، مفتی تقی عثمانی نے پان کھلادیا اور مفتی رفیع عثمانی نے بھی دورہ قلب کی خصوصی گولی حلق میں ڈال دی مگر جانبر نہ ہوسکے۔ مفتی تقی عثمانی نے لکھا کہ ہم دونوں بھائیوں کو چائے کی پیشکش کی لیکن ہم نے معذرت کی کہ دن میں ایک سے زیادہ مرتبہ چائے نہیں پیتے۔ پھر مفتی محمودؒ کو پان کا بٹوا دکھایا کہ حضرت ہمارے ساتھ یہ علت لگی ہوئی ہے۔ مفتی صاحب نے فرمایا کہ یہ تو چائے سے بھی بدتر ہے۔پھر آگے گفتگو لکھی مگر پان کھلانے اور گولی کا ذکر نہ کیا۔ جبکہ مولانا یوسف لدھیانوی شہیدؒ نے ان دونوں باتوں کا بھی ذکر کیا تھا جس پر مفتی تقی عثمانی نے ان کو جھاڑ بھی پلائی تھی۔ پان خور وہ ہوتا ہے جو تمباکو والا پان کھاتا ہو۔ اپنے بزرگوں کو اصرار کرکے تمباکو والا پان کھلانا غلط ہے اور اچھے بچے ایسا نہیں کرتے۔ مولانا فضل الرحمن اور مفتی تقی عثمانی کو ایک جگہ پر دعوت کیلئے مدعو کیا جائے اور کھانے کے بعد مفتی تقی عثمانی سے پان لیکر مولانا فضل الرحمن کو کھلادیا جائے تو سارا معمہ حل ہوجائیگا۔ کہیں ایسا نہ ہو کہ مولانا نے ابھی تو پان کھاہی لیا ہو اور پتہ چلے کہ مولانا کلٹی۔ مفتی محمودؒ چھپ کر پان ضرور کھاتے ہو نگے اورمولانا فضل الرحمن کو پان کھلانے سے گریز کیا جائے۔ پان کے چھونے سے منہ پھٹنا یقینی ہوتا ہے ۔
طلاق کے مسئلے پر مولانا فضل الرحمن نے اگر صحیح اسٹینڈ لیا تو چھوٹے موٹے بہت سے گناہ معاف ہوجائینگے۔ قرآن و سنت کے بنیادی مسئلے پر ذہن کھل جائے اور پھر بھی عقیدتمندوں کے گھر تباہ ہوں ، حلالوں کی لعنت سے دو چار ہوں اور اس پر چپ کی سادھ لی جائے تو دنیا میں بھی اور آخرت میں بھی بہت بڑی شرمندگی کا سامنا کرنا پڑے گا۔ پہلے مولانا فضل الرحمن مفتی محمودؒ کے مؤقف پر کھڑے تھے اور بینکوں سے کٹنے والی زکوٰۃ کو شراب کی بوتل پر آب زم زم کا لیبل قرار دیتے تھے ، پھر حکومتوں میں شامل ہوکر اپنے لوگوں کو زکوٰۃ کی کمیٹی کا چیئر مین بنانے کو ترجیح دی۔ بھوک کی حالت میں خنزیر کے گوشت کی بھی اجازت ہوتی ہے چلو ہم اس معاملے کو درست تعبیر پر محمول کرلیتے ہیں لیکن اتنا یاد رہے کہ درباری علماء نے ہمیشہ اسلام کے حلیہ کو بگاڑا ، پہلے تو علماء حق نے مزاحمت کی مگر بعد میں انکے جانشین آہستہ آہستہ رام ہوتے گئے، زکوٰۃ کے بعد سُود کا مسئلہ آیا، سارے علماء و مفتیان ایک طرف کھڑے ہیں اور مفتی تقی عثمانی اکیلے بینکوں سے معاوضہ لیکر سودی نظام کو اسلامی قرار دے رہا ہے۔ مولانا فضل الرحمن سیاسی مفادات کا خیال رکھیں مگر کچھ تو ایمان اور آخرت کیلئے بھی کریں۔ اسلام فطری دین ہے ،جسکوتاریخ کے ادوارمیں غیر فطری بنایا جاتارہا۔
امام ابو حنیفہؒ ، امام مالکؒ اور امام شافعیؒ متفق تھے کہ زمین کو مزارعت ، بٹائی ، کرایہ اور ٹھیکے پر دینا جائز نہیں اور اس کیلئے بہت سی احادیث صحیحہ بھی موجود ہیں۔ پھر علماء سُوء نے ان ائمہ حق کا ہی جانشین بن کر مزارعت کو یہ کہہ کر جائز قرار دیا کہ اسکی وجہ سے لوگ غلام بنتے تھے ورنہ اپنے اصل کے اعتبار سے ناجائز نہ تھا۔ حالانکہ آج بھی مزارعین غلاموں سے بدتر زندگی گزار رہے ہیں۔ مولانا فضل الرحمن خود پہلے اسی فکر کے بتائے جاتے ہیں لیکن بعد میں وہ خود بھی ان جاگیرداروں ، نوابوں اور وڈیروں کی صفوں میں شامل ہوگئے جن سے لڑنے نکلے تھے۔
ایمان ، قرآن اور آخرت کیلئے نہ سہی ، دنیا ، سیاست اور مفاد کیلئے ہی اسلام کے فطری نظام کو دنیا میں رائج کرنے کو اپنا مشن بنالیں ، حلالہ کی لعنت سے اپنے ہی عقیدتمندوں ہی کو بچالیں۔
اپنے من میں ڈوب کر پاجا سراغِ زندگی تو اگر میرا نہیں بنتا نہ بن ،اپنا تو بن
عوام کو فطری نظام کی دعوت دی جائے تو ملک کے کونے کونے سے خوش آمدید کی آوازیں ہی سنائی دیں گی اور بصورت دیگر عوام کے شعور پر زیادہ دیر تک پہرا لگانا ممکن نہیں ہے اور جب عوام کا شعور خود بیدار ہوجائے تو پھر علماء کو اپنے ٹھکانے بدلنے پڑیں گے۔ کراچی کے حالیہ احتجاج کے پیچھے نواز شریف کا پیسہ تو نہیں تھا تاکہ جمعیت کی نفری سے فوج کو ڈرایا جائے؟۔